Vor einere wuche isch offiziell dä beach walk in St. Kilda eröffned worde.... aber dä Petrus muen Europäer sii, er isch glaub no chli konfus was s wätter abelangt. 4 Seasons in a day isch e slight understatement! Gester bini mit x ersatz-kleiderschichte im rucksack an beach und ha mi mehr oder weniger erfolgriich vo dem würklich no zu chalte polarwind chöne schütze. Schräägerwiis laged bi mir jetzt scho SPF 20 fast nöd zum mich vormene sunnebrand z schütze! Eines tages wird ich dä alleiimporteur vo sunscreen over SPF 30 in Australie! Ich cha immernonöd glaube dass es da nüt höchers gitt, und ich bi bi wiitem nöd s einzig bleichgsicht da une. hä ja...
Mini best investition: mis velo. Ohni das wiredonkey wäri ziemlich ufgschmisse. und da mir natürlich uf em einzige hügel wiit und breit wohned, wirdi no zum profi bergfahrer! Ha jetzt au endlich e karate schuel gfunde, wo i dä nöchi isch! d.h. zerst 30min berg und talfahrt by bike, denn 1h training uf holzbode (autsch) und denn wieder 30min heiradle... läck han ich muskelkater gha nach em erste training! Das isch wohl dä einzig würklich fitnestest: 1h karate... ääächz... jetzt hani mir vorgnoh minimum 2x i dä wuche z ga. während ihr eu jetzt glücklich chönd chli winterpfündli afrässe mueni scho wieder a mini bikini figur dänke hehe...
Dä Jackson het e rolle glanded inere australische serie. Isch wie CSI eifach uf wasser (navy stuff). Er spielt denn en böösewicht und freut sich wienes chlises chind... isch nur für ei serie aber s tuet ihm guet. Mini karriere als snow eskimo/bunny or whatever isch scho glii wieder verbii und die nächst promo heisst oreo cookies! (nei, ich muen nöd als cookie verchleided umelaufe... hope not!) aber nachdem ich scho min erste aussie lohn ikassiert han bini also ziemlich motiviert... zahlt werde zum umestah und chli lächle, nöd übel! =) Am Jackson sin alte volvo hani au langsam im griff au ohni servolenkig. aber dä melbournian fahrstil isch scho ziemlich speziell. oftmals het e strass 2 spure, aber plötzlich hetts parkierti autos uf dä linke spur, d.h. all müend nach rechts ispure. muen ja wohl nöd erwähne, dass ich mal 2minute hinter mene parkierte auto gwartet han und mich no gwundered han, wieso die all überholed.... und die vortrittsregle mit em tram sind au sehr speziel. quasi: wenn mal hindermene tram bisch, isch fast keis verbiiga! und mer muen teils links ispuure zum rechts abbüüge.... muen das mal filme wenni unterwegs bin! es macht nöd würklich viel sinn das ganze. und da ich kei toll karte han, mueni immer d highways umfahre! Aber ich glaub ich kenn jetzt denn all grosse shopping centers im radius vo 1h by car! chönnt scho fast en "not for tourists guide melbourne" verfasse.
nach etlichem umegefahre mueni aber säge, dass ich würklich happy bin in St. Kilda z wohne. All andere quartier gsend sehr ähnlich us. boring! und im summer hockt eh ganz melbourne in st. kilda am beach. aber ich ha scho uswiichsmöglickeite erkundet hehe... alles im radius vo 1h mit velo! und wenn dä sevo mir denn mini blades bringt, umso besser! =) nur hani no kei ahni wie ich denn euse hügel uf oder ab chume ohni mir all chnoche z bräche.
Euses dihei isch würklich super! So langsam kenni all mini nachbere und dur dä innehof het mer immer mal wieder da und det en chat mit öppertem... mir hend au jede abig quasi dä sunneuntergang dihei! d sunne gat genau hinderem fenster vom vorderigang under und taucht die ganz wohnig ines orangigs liecht... isch no schön!
min nickname isch immerno "woman"... da wird sich wohl no lang nüt dra ändere. ha eu drum es video vo dem äffli attached - müend v.a. bi dem wo sie am bode liit und blabbered sehr guet anelose - "woman"!
aja ladies; wenni denn nächst jahr dihei bin, denn tueni denn zur abwächslig mal eu bechoche! nix me mit "take away" from lilly's! mach jetzt sogar mini madeleines selber.... yumm! ;o)
